मारेगाव पोलिसांची मोठी कारवाई; ४५ अंश तापमानात गोवंशाची क्रूर वाहतूक करणारी दोन वाहने जप्त

​मारेगाव : सचिन मेश्राम 

भीषण उन्हाच्या तडाख्यात मुक्या प्राण्यांची क्रूरपणे वाहतूक करणाऱ्या दोन वाहनांवर मारेगाव पोलिसांनी गौराळा शिवारात कारवाई केली. या कारवाईत पोलिसांनी ८ लाख ६० हजार रुपयांच्या मुद्देमालासह तीन आरोपींना ताब्यात घेतले असून, त्यांच्यावर प्राण्यांचा छळ प्रतिबंधक कायद्यांतर्गत गुन्हा दाखल केला आहे.

​मिळालेल्या माहितीनुसार, सोमवारी सायंकाळी ७ वाजेच्या सुमारास पोलीस निरीक्षक श्याम वानखेडे यांच्या मार्गदर्शनाखाली पोलीस पथक गस्तीवर होते. दरम्यान, गौराळा शिवारामध्ये दोन संशयास्पद वाहने थांबवून त्यांची तपासणी केली असता, त्यात ४ बैल अत्यंत निर्दयीपणे कोंबलेले आढळले. विदर्भात सध्या ४३ ते ४५ अंश सेल्सिअस तापमान असताना, या वाहनांवर सावलीसाठी साधे आच्छादनही नव्हते. तसेच जनावरांना आखूड दोरीने बांधून त्यांच्या चारा-पाण्याची कोणतीही सोय न करता ही वाहतूक केली जात होती.

​याप्रकरणी पोलिसांनी विठ्ठल लक्ष्मण वागदरकर (३९, रा. वरोरा), रत्नाकर मारोती वाकुळकर (४२, रा. टाकळी, जि. चंद्रपूर) आणि शनिदेवा शिवशंकर पांडे (२५, रा. वरोरा) या तिघांविरुद्ध गुन्हा दाखल केला आहे. पोलिसांनी ४ लाख रुपये किमतीचे अशोक लेलँड (MH 34 BZ 8489) आणि ३.५ लाख किमतीचे बोलेरो पिकअप (MH 34 AV 1037) यासह १ लाख १० हजार रुपयांचे ४ बैल, असा एकूण ८ लाख ६० हजार रुपयांचा मुद्देमाल जप्त केला.

​सदर कारवाई पोलीस निरीक्षक श्याम वानखेडे यांच्या मार्गदर्शनाखाली स.पो.उपनि. दिगांबर किनाके, पो.शि. सागर दिपेवार आणि नरेंद्र तुमराम यांनी केली. पुढील तपास मारेगाव पोलीस करीत आहेत.