वाजीद कुरेशी पांढरकवडा
घाटंजी : गणेशोत्सवाच्या उत्साहाला सामाजिक कार्याची जोड देत श्री सार्वजनिक गणेशोत्सव मंडळ (जलाराम गणेशोत्सव मंडळ), घाटंजी यांच्या वतीने बुधवार, १६ सप्टेंबर रोजी भव्य रक्तदान शिबिराचे आयोजन करण्यात आले आहे. शहरातील आठवडी बाजार परिसरात सकाळी ९ ते दुपारी २ वाजेपर्यंत हे शिबिर पार पडणार आहे.
जलाराम गणेशोत्सव मंडळाच्या वतीने गेल्या सात वर्षांपासून गणेशोत्सवाचे औचित्य साधून रक्तदान शिबिराचे आयोजन केले जात आहे. गणेशोत्सव केवळ धार्मिक उत्सव न राहता त्यातून समाजोपयोगी उपक्रम राबविण्याचा मंडळाचा प्रयत्न असून, रक्तदानाच्या माध्यमातून गरजू रुग्णांना मदतीचा हात देण्याचे काम सातत्याने केले जात आहे.
रुग्णालयांमध्ये अपघातग्रस्त रुग्ण, गंभीर आजारांवरील उपचार घेणारे रुग्ण तसेच विविध शस्त्रक्रियांसाठी दाखल होणाऱ्या रुग्णांना अनेकदा तातडीने रक्ताची आवश्यकता भासते. योग्य वेळी रक्त उपलब्ध न झाल्यास रुग्णांच्या उपचारात अडचणी निर्माण होऊ शकतात. ही गरज लक्षात घेऊन रक्तसंकलन वाढविण्याच्या उद्देशाने मंडळाने यंदाही रक्तदान शिबिराचे आयोजन केले आहे.
रक्तदान हे सर्वश्रेष्ठ सामाजिक कार्य असून, आपल्या रक्तदानामुळे एखाद्या गरजू रुग्णाला जीवनदान मिळू शकते. त्यामुळे नागरिकांनी केवळ उत्सवात सहभागी न होता सामाजिक जबाबदारीही पार पाडावी, असे आवाहन मंडळाच्या वतीने करण्यात आले आहे.
शहरातील युवक, सामाजिक कार्यकर्ते, व्यापारी तसेच सर्व नागरिकांनी मोठ्या संख्येने रक्तदान शिबिरात सहभागी होऊन या सामाजिक उपक्रमाला सहकार्य करावे, असे आवाहन मंडळाच्या सदस्यांनी केले आहे.
0 Comments