मारेगावचे सामाजिक कार्यकर्ते तुळशीराम पेंदोर यांची यवतमाळ जिल्हा आदिवासी काँग्रेसच्या जिल्हा उपाध्यक्षपदी नियुक्ती!
माजी मंत्री शिवाजीराव मोघे, वसंतराव पुरके व ॲड. अनिल कीनाके यांच्या हस्ते नियुक्तीपत्र प्रदान; मारेगाव तालुक्यात आनंदाचे वातावरण
मारेगाव - सचिन मेश्राम
मारेगाव शहरासह संपूर्ण तालुक्यात आपल्या सामाजिक आणि शैक्षणिक कार्याने वेगळी ओळख निर्माण करणारे सेवानिवृत्त शिक्षक तथा सामाजिक कार्यकर्ते श्री. तुळशीराम लक्ष्मणराव पेंदोर यांची 'यवतमाळ जिल्हा आदिवासी काँग्रेस'च्या जिल्हा उपाध्यक्षपदी सन्मानपूर्वक निवड करण्यात आली आहे. यवतमाळ येथे आयोजित काँग्रेस पक्षाच्या एका महत्त्वपूर्ण कार्यक्रमात त्यांना अधिकृत नियुक्तीपत्र प्रदान करण्यात आले. पेंदोर सरांच्या या निवडीमुळे मारेगाव तालुक्यातून त्यांच्यावर शुभेच्छांचा प्रचंड वर्षाव होत आहे.
दिग्गज नेत्यांच्या उपस्थितीत सोहळा
यवतमाळ जिल्हा आदिवासी काँग्रेसच्या कार्यकारिणीची घोषणा आणि नियुक्तीपत्र वितरण सोहळा ज्येष्ठ नेत्यांच्या प्रमुख उपस्थितीत पार पडला. काँग्रेस पक्षाचे ज्येष्ठ नेते तथा माजी मंत्री मा. शिवाजीराव मोघे साहेब, माजी शिक्षणमंत्री मा. प्रा. वसंतराव पुरके साहेब तसेच आदिवासी काँग्रेसचे जिल्हाध्यक्ष ॲड. अनिलजी कीनाके यांच्या हस्ते श्री. तुळशीराम पेंदोर यांना जिल्हा उपाध्यक्षपदाचे अधिकृत पत्र देऊन त्यांचा गौरव करण्यात आला. या प्रसंगी काँग्रेस पक्षाचे इतरही प्रमुख पदाधिकारी आणि कार्यकर्ते मोठ्या संख्येने उपस्थित होते.
शैक्षणिक आणि सामाजिक कार्याची पावती
श्री. तुळशीराम पेंदोर हे सेवानिवृत्त शिक्षक असून त्यांनी दीर्घकाळ शिक्षण क्षेत्रात सेवा दिली आहे. नोकरीत असताना आणि सेवानिवृत्तीनंतरही त्यांनी मारेगाव परिसरात आदिवासी समाज बांधवांचे प्रश्न, शैक्षणिक समस्या आणि सामाजिक उपक्रमांमध्ये नेहमीच हिरीरीने भाग घेतला आहे. त्यांच्या याच दांडग्या जनसंपर्काची आणि पक्षनिष्ठेची दखल घेत काँग्रेस पक्षाच्या वरिष्ठ नेतृत्वाने त्यांच्या खांद्यावर जिल्हा उपाध्यक्षपदाची मोठी जबाबदारी सोपवली आहे.
मारेगाव तालुक्यातून शुभेच्छांचा वर्षाव
तुळशीराम पेंदोर सरांची जिल्हा उपाध्यक्षपदी निवड झाल्याचे वृत्त मारेगाव शहरासह तालुक्यात पोहोचताच राजकीय, सामाजिक आणि शैक्षणिक वर्तुळातून आनंद व्यक्त केला जात आहे. त्यांच्या या निवडीमुळे मारेगाव तालुक्यात आदिवासी काँग्रेस संघटन अधिक मजबूत होईल, असा विश्वास कार्यकर्त्यांनी व्यक्त केला आहे. निवडीबद्दल पेंदोर सरांचे सर्व स्तरांतून 'जबरदस्त' अभिनंदन केले जात असून पुढील राजकीय प्रवासासाठी शुभेच्छा दिल्या जात आहेत.
0 Comments